శ్రీ కామాక్షీ స్తవః

 శ్రీ కామాక్షీ స్తవః

కండూలగండవిగళన్మదవారిధారా-
    గండూషపండితమధువ్రతమండితాయ |
శుండాలబంధురముఖాయ తుషారభాను-
    ఖండావతంసకలితాయ నమః శివాయ ||1||

రసాళతలభూషితం రజనిబంధునా భూషితం
    సమగ్రమనుకంపయా సవిధసేవితం కంపయా |
నమత్సుమనసం పదే నమత సంతతం సంపదే
    గిరీశమధికాంచి తం గిరిసుతాకుచాంకాంచితం ||2||

జయంతి శ్రీమంతో జడిమహిమసంహారమిహిరా
    మనీషామాకందప్రసవనవవాసంతదివసాః |
గిరాం నాథే! నానారసభణితియోషాభిసరణ-
    ప్రదోషా నిర్దోషాస్తవ చరణ సన్నామవిధయః ||3||

క ఏష ప్రస్తావస్తవ నవనసన్నాహపదవీ -
    దవీయో దేవీదం ధిషణధిషణానైపుణమపి |
తదాస్తాముద్యోగః స్తుతివచసి యాచే పునరిదం
    సమస్తోఽత్ర స్తోత్రీభవతు మమ సంజల్పనవిధిః ||4||

సదా యాచం యాచం కథితబహువాచం జనమిమం
    ప్రతి క్రోధో వేధోరమణి! కరణీయో న కలయా |
న యోగప్రావీణ్యం న చ బహువిధస్తోత్రపటిమా
    న వా సేవాదాక్ష్యం కిమిహ విదధే యాచనమృతే ||5||

జతుద్రావం దేవి! ద్రవతు జవతశ్చిత్తజడిమా
    శరత్పద్మోన్మీలం మమ విలలమున్మీలతు మనః |
ముఖాద్వీచీ వాచాం త్రిదివవిగళన్నిర్జరధునీ-
    తరంగాళీగాళం గళతు మధునిష్యందమధురా ||6||

జగన్నాథే ! జాల్మం నిబిడజడిభగ్రంథిజటిలం
    జనం దీనం మైనం జనని ! మనుథాః స్మాన్యశరణం |
ప్రమీళాప్రభ్లానం పదయుగళనాళీకవిగళ-
    న్మధూళీపాళీభిర్మమ సరజసం క్షాళయ మనః ||7||

జగన్మాతర్జాతప్రథిమని మనీషాజడిమని
    స్తృణానే ఖిందానః కిమివ మనవై కిం వితనవై |
ప్రసీదాసీదాత్మన్యఖిలదురితోత్సాదిని ! దినే
    దినే దీనేఽదీనే! మయి వితర కారుణ్యకణికాం ||8||

కరే వామే వామే ! కమలమృదుళే పుస్తకధరం
    పరస్మిన్ సాక్షస్రక్స్ఫటికనిభమత్రాసవరదం |
భవత్వంతః సాక్షాదకృపణకృపాకందళమిళత్-
    కటాక్షవ్యాపారం వపురుపనిషజ్జీవితమిదం ||9||

కృపాకోపాటోపస్ఫురితపదపంచాస్యదళితాద్
    ధనస్వాంతధ్వాంతప్రకరకరిసందోహశిరసః |
సమున్ముక్తా ముక్తామణయ ఇవ శుద్ధా భణితయోస
    భవద్భక్తాస్యేభ్యో భగవతి! విసర్పంతి పరితః ||10||

మమాంతర్వాణి ! త్వం హర తిమిరమిత్యర్థనవిధాం
    విధాస్యన్ యస్తస్మై పదయుగళమాత్రం కథయతే |
అసౌ శాస్త్రజ్ఞత్వం వరయితుముపక్రాంత ఇతి తద్
    దదానః సద్యస్తే జయతి సదయాసంభ్రమరసః ||11||

అసౌ సేవా దావే రుదితమియమిజ్యా జలలిపి-
    ర్గజస్నానం ధ్యానం తదపి స జపో భస్మని హుతం |
ప్రణామో నామష ప్రకృతిజళమూకాంఘ్రిపతనం
    యదంబాలంబ్యేత ప్రతిదినమనుద్దిశ్య భవతీం ||12||

సజీవో మా జీవన్ భవతి బత మా జాగ్రదపి మా
    విజానన్ మా ధ్యాయన్ జనజనని ! తస్యాస్త్వజననిః |
న యస్త్వామాశాస్తే న వినమతి న స్తౌతి మనుతే
    న నోపాస్తే నాధ్యేత్యవతి న వృణీతే న చ సకృత్ ||13||

గళద్దభ్భాం శుభ్భత్పృథులకుచకుంభాం హృతశశి-
    ప్రభాడభ్భాం సంభావితలిఖితగుభ్ఫాజపపటాం |
మనస్తంభారభ్భప్రథుమని(?) భజే త్వాం కృతకృపా-
    పరీరభ్భామ్మంభోరుహసదనసంభోగకలికాం ||14||

భవత్యా నిత్యోత్తంసితసితసుధాతివిగళత్-
    సుధాసారస్రోతోవిసర ఇవ హృత్పంకజజుషః |
నృణాం త్వద్ధ్యాతౄణాం నవవదననాళీకకుహర-
    ప్రణాళీనాళేన క్షరతి కవితాసౌరభభరః ||15||

గతిస్విన్నాం వన్యస్తబకనివహన్యాసవిలసత్-
    కచాం కేచిత్ కాచావలిఖచితనీచేతరకుచాం |
హృది త్వామీక్షంతే కపటమృగయోః పత్రపటలీ-
    దుకూలాం కాలారేరనుపదచరీం కాననచరీం ||16||

ధరే ! దుర్గాం స్వర్గా ధిపవిమతవర్గాపహరణీం
    మహారంహస్సింహప్రవరపరివిన్యస్తచరణాం |
కరే వల్గత్ఖడ్గప్రవిహితజగత్త్రాణవిభవాం
    భవార్తివ్యావృత్త్యై భగవతి ! భజంతే హి భవతీం ||17||

ఇదం స్యాదేతత్ స్యాన్మమ పునరదః స్యాదితి సదా
    శ్రుతం వా దృష్టం వా సకలముపయాచే న భవతీం |
సకృన్మహ్యం ముహ్యన్మలినమనసే మాతరమలాం
    త్వదీయే దీయేత ద్యుతిమతి పదే భారతి! రతిం ||18||

అథో యా వా సా వా భవ భవరమేశాంబుజభువా-
    మపీడ్యే ! పీడ్యేఽహం జనజనని ! జాడ్యేన న యథా |
తథా భ్రూయాద్ భూయానిహ తవ విభూతిస్తవవిధిః
    కథంకారం కర్తుం కవిభిరపి శక్యేత సకలః ||19||
    
ఇతి కామాక్షీస్తవః సంపూర్ణః |