శ్రీ విష్ణు స్తవరాజః

శ్రీ విష్ణు స్తవరాజః కల్కిపురాణే

పద్మోవాచ |
యోగేన సిద్ధవిబుధైః పరిభావ్యమానం
లక్ష్మ్యాలయం తులసికాచితభక్తభృంగం |
ప్రోత్తుంగరక్తనఖరాంగుళిపత్రచిత్రం
గంగారసం హరిపదాంబుజమాశ్రయేఽహం || 1 ||

గుంఫన్మణిప్రచయఘట్టితరాజహంస-
-సింజత్సునూపురయుతం పదపద్మవృందం |
పీతాంబరాంచలవిలోలచలత్పతాకం
స్వర్ణత్రివక్రవలయం చ హరేః స్మరామి || 2 ||

జంఘే సుపర్ణగళనీలమణిప్రవృద్ధే
శోభాస్పదారుణమణిద్యుతిచుంచుమధ్యే |
ఆరక్తపాదతలలంబనశోభమానే
లోకేక్షణోత్సవకరే చ హరేః స్మరామి || 3 ||

తే జానునీ మఖపతేర్భుజమూలసంగ-
-రంగోత్సవావృతతటిద్వసనే విచిత్రే |
చంచత్పతత్రిముఖనిర్గతసామగీత-
-విస్తారితాత్మయశసీ చ హరేః స్మరామి || 4 ||

విష్ణోః కటిం విధికృతాంతమనోజభూమిం
జీవాండకోశగణసంగదుకూలమధ్యాం |
నానాగుణప్రకృతిపీతవిచిత్రవస్త్రాం
ధ్యాయే నిబద్ధవసనాం ఖగపృష్ఠసంస్థాం || 5 ||

శాతోదరం భగవతస్త్రివళిప్రకాశ-
-మావర్తనాభివికసద్విధిజన్మపద్మం |
నాడీనదీగణరసోత్థసితాంత్రసింధుం
ధ్యాయేఽండకోశనిలయం తనులోమరేఖం || 6 ||

వక్షః పయోధితనయాకుచకుంకుమేన
హారేణ కౌస్తుభమణిప్రభయా విభాతం |
శ్రీవత్సలక్ష్మ హరిచందనజప్రసూన-
-మాలోచితం భగవతః సుభగం స్మరామి || 7 ||

బాహూ సువేషసదనౌ వలయాంగదాది-
-శోభాస్పదౌ దురితదైత్యవినాశదక్షౌ |
తౌ దక్షిణౌ భగవతశ్చ గదాసునాభ-
-తేజోర్జితౌ సులలితౌ మనసా స్మరామి || 8 ||

వామౌ భుజౌ మురరిపోర్ధృతపద్మశంఖౌ
శ్యామౌ కరీంద్రకరవన్మణిభూషణాఢ్యౌ |
రక్తాంగుళిప్రచయచుంబితజానుమధ్యౌ
పద్మాలయాప్రియకరౌ రుచిరౌ స్మరామి || 9 ||

కంఠం మృణాళమమలం ముఖపంకజస్య
లేఖాత్రయేణ వనమాలికయా నివీతం |
కిం వా విముక్తివశమంత్రకసత్ఫలస్య
వృంతం చిరం భగవతః సుభగం స్మరామి || 10 ||

వక్త్రాంబుజం దశనహాసవికాసరమ్యం
రక్తాధరోష్ఠవరకోమలవాక్సుధాఢ్యం |
సన్మానసోద్భవచలేక్షణపత్రచిత్రం
లోకాభిరామమమలం చ హరేః స్మరామి || 11 ||

సూరాత్మజావసథగంధమిదం సునాసం
భ్రూపల్లవం స్థితిలయోదయకర్మదక్షం |
కామోత్సవం చ కమలాహృదయప్రకాశం
సంచింతయామి హరివక్త్రవిలాసదక్షం || 12 ||

కర్ణౌ లసన్మకరకుండలగండలోలౌ
నానాదిశాం చ నభసశ్చ వికాసగేహం |
లోలాలకప్రచయచుంబనకుంచితాగ్రౌ
లగ్నౌ హరేర్మణికిరీటతటే స్మరామి || 13 ||

భాలం విచిత్రతిలకం ప్రియచారుగంధం
గోరోచనారచనయా లలనాక్షిసఖ్యం |
బ్రహ్మైకధామమణికాంతకిరీటజుష్టం
ధ్యాయే మనోనయనహారకమీశ్వరస్య || 14 ||

శ్రీవాసుదేవచికురం కుటిలం నిబద్ధం
నానాసుగంధికుసుమైః స్వజనాదరేణ |
దీర్ఘం రమాహృదయగాశమనం ధునంతం
ధ్యాయేఽంబువాహరుచిరం హృదయాబ్జమధ్యే || 15 ||

మేఘాకారం సోమసూర్యప్రకాశం
సుభ్రూన్నాసం శక్రచాపైకమానం |
లోకాతీతం పుండరీకాయతాక్షం
విద్యుచ్చైలం చాశ్రయేఽహం త్వపూర్వం || 16 ||

దీనం హీనం సేవయా దైవగత్యా
పాపైస్తాపైః పూరితం మే శరీరం |
లోభాక్రాంతం శోకమోహాదివిద్ధం
కృపాదృష్ట్యా పాహి మాం వాసుదేవ || 17 ||

యే భక్త్యాఽద్యాం ధ్యాయమానాం మనోజ్ఞాం
వ్యక్తిం విష్ణోః షోడశశ్లోకపుష్పైః |
స్తుత్వా నత్వా పూజయిత్వా విధిజ్ఞాః
శుద్ధా ముక్తా బ్రహ్మసౌఖ్యం ప్రయాంతి || 18 ||

పద్మేరితమిదం పుణ్యం శివేన పరిభాషితం |
ధన్యం యశస్యమాయుష్యం స్వర్గ్యం స్వస్త్యయనం పరం || 19 ||

పఠంతి యే మహాభాగాస్తే ముచ్యంతేఽహసోఽఖిలాత్ |
ధర్మార్థకామమోక్షాణాం పరత్రేహ ఫలప్రదం || 20 ||

ఇతి శ్రీకల్కిపురాణే పద్మకృత శ్రీ విష్ణు స్తవరాజః ||