శ్రీ విష్ణోర్దివ్యస్థల స్తోత్రం

శ్రీ విష్ణోర్దివ్యస్థల స్తోత్రం

అర్జున ఉవాచ |
క్షేత్రేషు యేషు యేషు త్వం చింతనీయో మయాచ్యుత |
చేతసః ప్రణిధానార్థం తన్మమాఖ్యాతుమర్హసి || 1 ||

యత్ర యత్ర చ యన్నామ ప్రీతయే భవతః స్తుతౌ |
ప్రసాదసుముఖో నాథ తన్మమాశేషతో వద || 2 ||

భగవానువాచ |
సర్వగః సర్వభూతోఽహం న హి కించిన్మయా వినా |
చరాచరే జగత్యస్మిన్ విద్యతే కురుసత్తమ || 3 ||

తథాపి యేషు స్థానేషు చింతనీయోఽహమర్జున |
స్తోతవ్యో నామభిర్యైశ్చ శ్రూయతాం తద్వదామి తే || 4 ||

పుష్కరే పుండరీకాక్షం గయాయాం చ గదాధరం |
లోహదండే తథా విష్ణుం స్తువంస్తరతి దుష్కృతం || 5 ||

రాఘవం చిత్రకూటే తు ప్రభాసే దైత్యసూదనం |
బృందావనే చ గోవిందం మాం స్తువన్ పుణ్యభాగ్భవేత్ || 6 ||

జయం జయంత్యాం తద్వచ్చ జయంతం హస్తినాపురే |
వరాహం కర్దమాలే తు కాశ్మీరే చక్రపాణినం || 7 ||

జనార్దనం చ కుబ్జామ్రే మథురాయాం చ కేశవం |
కుబ్జకే శ్రీధరం తద్వద్గంగాద్వారే సురోత్తమం || 8 ||

సాలగ్రామే మహాయోగిం హరిం గోవర్ధనాచలే |
పిండారకే చతుర్బాహుం శంఖోద్ధారే చ శంఖినం || 9 ||

వామనం తు కురుక్షేత్రే యమునాయాం త్రివిక్రమం |
విశ్వేశ్వరం తథా శోణే కపిలం పూర్వసాగరే || 10 ||

శ్వేతద్వీపపతిం చాపి గంగాసాగరసంగమే |
భూధరం దేవికానద్యాం ప్రయాగే చైవ మాధవం || 11 ||

నరనారాయణాఖ్యం చ తథా బదరికాశ్రమే |
సముద్రే దక్షిణే స్తవ్యం పద్మనాభేతి ఫాల్గున || 12 ||

ద్వారకాయాం తథా కృష్ణం స్తువంస్తరతి దుర్గతిం |
రామం నామ మహేంద్రాద్రౌ హృషీకేశం తథార్బుదే || 13 ||

అశ్వతీర్థే హయగ్రీవం విశ్వరూపం హిమాచలే |
నృసింహం కృతసౌచే చ విపాశాయాం ద్విజప్రియం || 14 ||

నైమిషే యజ్ఞపురుషం జంబూమార్గే తథాచ్యుతం |
అనంతం సైంధవారణ్యే దండకే శార్ఙ్గధారిణం || 15 ||

ఉత్పలావర్తకే శౌరిం నర్మదాయాం శ్రియః పతిం |
దామోదరం రైవతకే నందాయాం జలశాయినం || 16 ||

సర్వయోగేశ్వరం చైవ సింధుసాగరసంగమే |
సహ్యాద్రౌ దేవదేవేశం వైకుంఠం మాగధే వనే || 17 ||

సర్వపాపహరం వింధ్యే చోడ్రేషు పురుషోత్తమం |
హృదయే చాపి కౌంతేయ పరమాత్మానమాత్మనః || 18 ||

వటే వటే వైశ్రవణం చత్వరే చత్వరే శివం |
పర్వతే పర్వతే రామం సర్వత్ర మధుసూదనం || 19 ||

నరం భూమౌ తథా వ్యోమ్ని కౌంతేయ గరుడధ్వజం |
వాసుదేవం చ సర్వత్ర సంస్మరేజ్జ్యోతిషాం పతిం || 20 ||

అర్చయన్ ప్రణమన్ స్తున్వన్ సంస్మరేశ్చ ధనంజయ |
ఏతేష్వేతాని నామాని నరః పాపాత్ ప్రముచ్యతే || 21 ||

స్థానేష్వేతేషు మన్నామ్నామేతేషాం ప్రీణనం నరః |
ద్విజానాం ప్రీణనం కృత్వా స్వర్గలోకేఽభిజాయతే || 22 ||

నామాన్యేతాని కౌంతేయ స్థానాన్యేతాని చాత్మవాన్ |
జపన్ వై పంచపంచాశత్ త్రిసంధ్యం మత్పరాయణః || 23 ||

త్రీణి జన్మాని యత్పాపమవస్థాత్రితయే కృతం |
తత్క్షాలయత్యసందిగ్ధం జాయతే చ సతాం కులే || 24 ||

ద్వికాలం వా జపన్వైతద్దివారాత్రౌ చ యత్కృతం |
తస్మాద్విముచ్యతే పాపాత్ సంస్తువన్పరమో నరః || 25 ||

జప్తాన్యేతాని కౌంతేయ సకృచ్ఛ్రద్ధాసమన్వితం |
మోచయంతి నరం పాపాద్యత్తత్రైవ దినే కృతం || 26 ||

ధన్యం యశస్యమాయుష్యం జయం కురు కులోద్వహ |
గ్రహానుకూలతాం చైవ కరోత్యాశు న సంశయః || 27 ||

ఉపోషితో మత్పరమః స్థానేష్వేతేషు మానవః |
కృతాయతనవాసశ్చ ప్రాప్నోత్యభిమతం ఫలం || 28 ||

ఉత్క్రాంతిరప్యశేషేషు స్థానేష్వేతేషు శస్యతే |
అన్యస్థానాచ్ఛతగుణమేతేష్వనశనాదికం || 29 ||

యస్తు మత్పరమః కాలం కరోత్యేతేషు మానవః |
దేవానామపి పూజ్యోఽసౌ మమ లోకే మహీయతే || 30 ||

స్థానేష్వథైతేషు చ యే వసంతి
సంపూజయంతే మమ సర్వకాలం |
తదేహ చాంతే త్రిదివం ప్రయాంతి
నాకం చ లోకం సమవాప్నువంతి || 34 ||

ఇతి శ్రీవిష్ణుధర్మోత్తరే తృతీయఖండే మార్కండేయవజ్రసంవాదే అర్జునం ప్రతి కృష్ణోపదేశే స్థానవిశేషకీర్తనమాహాత్మ్యవర్ణనో నామ పంచవింశత్యుత్తరశతతమోఽధ్యాయః |