శ్రీ సుపర్ణ స్తోత్రం (మహాభారతే)

శ్రీ సుపర్ణ స్తోత్రం (మహాభారతే)

దేవా ఊచుః |
త్వమృషిస్త్వం మహాభాగస్త్వం దేవః పతగేశ్వరః |
త్వం ప్రభుస్తపనః సూర్యః పరమేష్ఠీ ప్రజాపతిః || 1 ||

త్వమింద్రస్త్వం హయముఖస్త్వం శర్వస్త్వం జగత్పతిః |
త్వం ముఖం పద్మజో విప్రస్త్వమగ్నిః పవనస్తథా || 2 ||

త్వం హి ధాతా విధాతా చ త్వం విష్ణుః సురసత్తమః |
త్వం మహానభిభూః శశ్వదమృతం త్వం మహద్యశః |
త్వం ప్రభాస్త్వమభిప్రేతం త్వం నస్త్రాణమనుత్తమం || 3 ||

బలోర్మిమాన్ సాధురదీనసత్త్వః
సమృద్ధిమాన్ దుర్విషహస్త్వమేవ |
త్వత్తః సృతం సర్వమహీనకీర్తే
హ్యనాగతం చోపగతం చ సర్వం || 4 ||

త్వముత్తమః సర్వమిదం చరాచరం
గభస్తిభిర్భానురివావభాససే |
సమాక్షిపన్ భానుమతః ప్రభాం ముహు-
-స్త్వమంతకః సర్వమిదం ధ్రువాధ్రువం || 5 ||

దివాకరః పరికుపితో యథా దహేత్
ప్రజాస్తథా దహసి హుతాశనప్రభ |
భయంకరః ప్రలయ ఇవాగ్నిరుత్థితో
వినాశయన్ యుగపరివర్తనాంతకృత్ || 6 ||

ఖగేశ్వరం శరణముపాగతా వయం
మహౌజసం జ్వలనసమానవర్చసం |
తడిత్ప్రభం వితిమిరమభ్రగోచరం
మహాబలం గరుడముప్యేత ఖేచరం || 7 ||

పరావరం వరదమజయ్యవిక్రమం
తవౌజసా సర్వమిదం ప్రతాపితం |
జగత్ప్రభో తప్తసువర్ణవర్చసా
త్వం పాహి సర్వాంశ్చ సురాన్ మహాత్మనః || 8 ||

భయాన్వితా నభసి విమానగామినో
విమానితా విపథగతిం ప్రయాంతి తే |
ఋషేః సుతస్త్వమసి దయావతః ప్రభో
మహాత్మనః ఖగవర కశ్యపస్య హ || 9 ||

స మా క్రుధః కురు జగతో దయాం పరాం
త్వమీశ్వరః ప్రశమముపైహి పాహి నః |
మహాశనిస్ఫురితసమస్వనేన తే
దిశోఽంబరం త్రిదివమియం చ మేదినీ || 10 ||

చలంతి నః ఖగ హృదయాని చానిశం
నిగృహ్యతాం వపురిదమగ్నిసన్నిభం |
తవ ద్యుతిం కుపితకృతాంతసన్నిభాం
నిశమ్య నశ్చలతి మనోఽవ్యవస్థితం |
ప్రసీద నః పతగపతే ప్రయాచతాం
శివశ్చ నో భవ భగవన్ సుఖావహః || 11 ||

ఏవం స్తుతః సుపర్ణస్తు దేవైః సర్షిగణైస్తదా |
తేజసః ప్రతిసంహారమాత్మనః స చకార హ || 12 ||

ఇతి శ్రీమన్మహాభారతే ఆదిపర్వణి త్రయోవింశోఽధ్యాయే దేవకృత శ్రీ సుపర్ణ స్తోత్రం ||