శ్రీ శివ మానసిక పూజా స్తోత్రం

శ్రీ శివ మానసిక పూజా స్తోత్రం

అనుచితమనులపితం మే త్వయి శంభో శివ తదాగసశ్శాంత్యై |
అర్చాం కథమపి విహితామంగీకురు సర్వమంగలోపేత || 1 ||

ధ్యాయామి కథమివ త్వాం ధీవర్త్మవిదూర దివ్యమహిమానం |
ఆవాహనం విభోస్తే దేవాగ్ర్య భవేత్ప్రభో కుతః స్థానాత్ || 2 ||

కియదాసనం ప్రకల్ప్యం కృతాసనస్యేహ సర్వతోఽపి సహ |
పాద్యం కుతోఽర్ఘ్యమపి వా పాద్యం సర్వత్రపాణిపాదస్య || 3 ||

ఆచమనం తే స్యాదధిభగవన్ తే సర్వతోముఖస్య కథం |
మధుపర్కో వా కథమిహ మధువైరిణి దర్శితప్రసాదస్య || 4 ||

స్నానేన కిం విధేయం సలిలకృతేనేహ నిత్యశుద్ధస్య |
వస్త్రేణాపి న కార్యం దేవాధిపతే దిగంబరస్యేహ || 5 ||

స్ఫురతి హి సర్పాభరణం సర్వాంగే సర్వమంగలాకార |
అతివర్ణాశ్రమిణస్తేఽస్త్యుపవీతేనేహ కశ్చిదుత్కర్షః || 6 ||

గంధవతీ హి తనుస్తే గంధాః కిం నేశ పౌనరుక్తాయ |
పుష్కలఫలదాతారం పుష్కరకుసుమేన పూజయామి త్వాం || 7 ||

శమధనమూలధనం త్వాం సకలేశ్వర భవసి ధూపితః కేన |
దీపః కథం శిఖావాన్ దీప్యేత పురః స్వయంప్రకాశస్య || 8 ||

అమృతాత్మకమపి భగవన్నశనం కిన్నామ నిత్యతృప్తస్య |
త్వయ్యామ్రేడితమేతత్తాంబూలం యదిహ సుముఖరాగాయ || 9 ||

ఉపహారీభూయాదిదముమేశ యన్మే విచేష్టితమశేషం |
నీరాజయామి తమిమం నానాత్మానం సహాఖిలైః కరణైః || 10 ||

సుమనశ్శేఖర భవ తే సుమనోఽఞ్జలిరేష కో భవేచ్ఛంభో |
ఛత్రం ద్యుమన్ ద్యుమార్ధన్ చామరమపి కిం జితశ్రమస్య తవ || 11 ||

నృత్యం ప్రథతాం కథమివ నాథ తవాగ్రే మహానటస్యేహ |
గీతం కిం పురవైరిన్ గీతాగమమూలదేశికస్య పురః || 12 ||

వాద్యం డమరు భృతస్తే వాదయితుం తే పురోఽస్తి కా శక్తిః |
అపరిచ్ఛిన్నస్య భవేదఖిలేశ్వర కః ప్రదక్షిణవిధిస్తే || 13 ||

స్యుస్తే నమాంసి కథమివ శంకర పరితోఽపి విద్యమానస్య |
వాచామగోచరే త్వయి వాక్ప్రసరో మే కథం సుసంభవతు || 14 ||

నిత్యానందాయ నమో నిర్మలవిజ్ఞానవిగ్రహాయ నమః |
నిరవధికరుణాయ నమో నిరవధివిభవాయ తేజసేఽస్తు నమః || 15 ||

సరసిజవిపక్షచూడః సగరతనూజన్మసుకృతమూర్ధాఽసౌ |
దృక్కూలంకషకరుణో దృష్టిపథే మేఽస్తు ధవలిమా కోఽపి || 16 ||

జగదాధారశరాసం జగదుత్పాదప్రవీణయంతారం |
జగదవనకర్మఠశరం జగదుద్ధారం శ్రయామి చిత్సారం || 17 ||

కువలయసహయుధ్వగలైః కులగిరికూటస్థకవచితార్ధాంగైః |
కలుషవిదూరైశ్చేతః కబలితమేతత్కృపారసైః కించిత్ || 18 ||

వసనవతేకత్కృత్త్యా వాసవతే రజతశైలశిఖరేణ |
వలయవతే భోగభృతా వనితార్ధాంగాయ వస్తునేఽస్తు నమః || 19 ||

సరసిజకువలయ-జాగరసంవేశన జాగరూకలోచనతః |
సకృదపి నాహం జానే సుతరాంతం భాష్యకారమంజీరాత్ || 20 ||

ఆపాటలజూటానా-మానీలచ్ఛాయకంధరా-సీమ్నాం |
ఆపాండువిగ్రహాణామాద్రుహిణం కింకరా వయం మహసాం || 21 ||

ముషితస్మరావలేపే మునితనయాయుర్వదాన్యపదపద్మే |
మహసి మనో రమతాం మే మనసి దయాపూరమేదురాపాంగే || 22 ||

శర్మణి జగతాం గిరిజానర్మణి సప్రేమహృదయపరిపాకే |
బ్రహ్మణి వినమద్రక్షణకర్మణి తస్మిన్నుదేతు భక్తిర్మే || 23 ||

కస్మిన్నపి సమయే మమ కంఠచ్ఛాయావిధూతకాలాభ్రం |
అస్తు పురో వస్తు కిమప్యర్ధాంగేదరమున్మిషన్నిటలం || 24 ||

జటిలాయ మౌలిభాగే జలధర నీలాయ కంధరాభోగే |
ధవలాయ వపుషి నిఖిలే ధామ్నేస్స్యాన్మానసే నమోవాకః || 25 ||

అకరవిరాజత్సుమృగై-రవృషతురంగై-రమౌలిధృతగంగైః |
అకృతమనోభవభంగైరలమన్యైర్జగతి దైవతం మన్యైః || 26 ||

కస్మై వచ్మి దశాం మే కస్యేదృగ్ఘృదయమస్తి శక్తిర్వా |
కస్య బలం చోద్ధర్తుం క్లేశాత్త్వామంతరా దయాసింధో || 27 ||

యాచే హ్యనభినవం తే చంద్రకలోత్తంస కించిదపి వస్తు |
మహ్యం ప్రదేహి భగవన్ మదీయమేవ స్వరూపమానందం || 28 ||

భగవన్బాలతయా వాఽభక్త్యా వాఽప్యాపదాకులతయా వా |
మోహావిష్టతయా వా మాఽస్తు చ తే మనసి యద్దురుక్తం మే || 29 ||

యది విశ్వాధికతా తే యది నిగమాగమపురాణయాథార్థ్యం |
యది వా భక్తేషు దయా తదిహ మహేశాశు పూర్ణకామస్స్యాం || 30 ||

ఇతి శివానందావధూతరచిత శివమానసికపూజాస్తోత్రం |