శ్రీ నారాయణ హృదయ స్తోత్రం

శ్రీ నారాయణ హృదయ స్తోత్రం

అస్య శ్రీనారాయణ హృదయ స్తోత్ర మంత్రస్య భార్గవ ఋషిః, అనుష్టుప్ ఛందః, శ్రీలక్ష్మీనారాయణో దేవతా, ఓం బీజం, నమః శక్తిః, నారాయణాయేతి కీలకం, శ్రీలక్ష్మీనారాయణ ప్రీత్యర్థే జపే వినియోగః ||

కరన్యాసః –
నారాయణః పరం జ్యోతిరితి అంగుష్ఠాభ్యాం నమః |
నారాయణః పరం బ్రహ్మేతి తర్జనీభ్యాం నమః |
నారాయణః పరో దేవ ఇతి మధ్యమాభ్యాం నమః |
నారాయణః పరం ధామేతి అనామికాభ్యాం నమః |
నారాయణః పరో ధర్మ ఇతి కనిష్ఠికాభ్యాం నమః |
విశ్వం నారాయణ ఇతి కరతలకరపృష్ఠాభ్యాం నమః |

అంగన్యాసః –
నారాయణః పరం జ్యోతిరితి హృదయాయ నమః |
నారాయణః పరం బ్రహ్మేతి శిరసే స్వాహా |
నారాయణః పరో దేవ ఇతి శిఖాయై వౌషట్ |
నారాయణః పరం ధామేతి కవచాయ హుం |
నారాయణః పరో ధర్మ ఇతి నేత్రాభ్యాం వౌషట్ |
విశ్వం నారాయణ ఇతి అస్త్రాయ ఫట్ |

ఓం ఐంద్ర్యాదిదశదిశం ఓం నమః సుదర్శనాయ సహస్రారాయ హుం ఫట్ బధ్నామి నమశ్చక్రాయ స్వాహా | ఇతి ప్రతిదిశం యోజ్యం |

అథ ధ్యానం |
ఉద్యదాదిత్యసంకాశం పీతవాసం చతుర్భుజం |
శంఖచక్రగదాపాణిం ధ్యాయేల్లక్ష్మీపతిం హరిం || 1 ||

త్రైలోక్యాధారచక్రం తదుపరి కమఠం తత్ర చానంతభోగీ
తన్మధ్యే భూమిపద్మాంకుశశిఖరదళం కర్ణికాభూతమేరుం |
తత్రస్థం శాంతమూర్తిం మణిమయమకుటం కుండలోద్భాసితాంగం
లక్ష్మీనారాయణాఖ్యం సరసిజనయనం సంతతం చింతయామి || 2 ||

ఓం | నారాయణః పరం జ్యోతిరాత్మా నారాయణః పరః |
నారాయణః పరం బ్రహ్మ నారాయణ నమోఽస్తు తే || 1 ||

నారాయణః పరో దేవో ధాతా నారాయణః పరః |
నారాయణః పరో ధాతా నారాయణ నమోఽస్తు తే || 2 ||

నారాయణః పరం ధామ ధ్యానం నారాయణః పరః |
నారాయణః పరో ధర్మో నారాయణ నమోఽస్తు తే || 3 ||

నారాయణః పరో దేవో విద్యా నారాయణః పరః |
విశ్వం నారాయణః సాక్షాన్నారాయణ నమోఽస్తు తే || 4 ||

నారాయణాద్విధిర్జాతో జాతో నారాయణాద్భవః |
జాతో నారాయణాదింద్రో నారాయణ నమోఽస్తు తే || 5 ||

రవిర్నారాయణస్తేజః చంద్రో నారాయణో మహః |
వహ్నిర్నారాయణః సాక్షాన్నారాయణ నమోఽస్తు తే || 6 ||

నారాయణ ఉపాస్యః స్యాద్గురుర్నారాయణః పరః |
నారాయణః పరో బోధో నారాయణ నమోఽస్తు తే || 7 ||

నారాయణః ఫలం ముఖ్యం సిద్ధిర్నారాయణః సుఖం |
హరిర్నారాయణః శుద్ధిర్నారాయణ నమోఽస్తు తే || 8 ||

నిగమావేదితానంతకల్యాణగుణవారిధే |
నారాయణ నమస్తేఽస్తు నరకార్ణవతారక || 9 ||

జన్మమృత్యుజరావ్యాధిపారతంత్ర్యాదిభిః సదా |
దోషైరస్పృష్టరూపాయ నారాయణ నమోఽస్తు తే || 10 ||

వేదశాస్త్రార్థవిజ్ఞానసాధ్యభక్త్యేకగోచర |
నారాయణ నమస్తేఽస్తు మాముద్ధర భవార్ణవాత్ || 11 ||

నిత్యానంద మహోదార పరాత్పర జగత్పతే |
నారాయణ నమస్తేఽస్తు మోక్షసామ్రాజ్యదాయినే || 12 ||

ఆబ్రహ్మస్తంబపర్యంతమఖిలాత్మమహాశ్రయ |
సర్వభూతాత్మభూతాత్మన్ నారాయణ నమోఽస్తు తే || 13||

పాలితాశేషలోకాయ పుణ్యశ్రవణకీర్తన |
నారాయణ నమస్తేఽస్తు ప్రలయోదకశాయినే || 14 ||

నిరస్త సర్వదోషాయ భక్త్యాది గుణదాయినే |
నారాయణ నమస్తేఽస్తు త్వాం వినా న హి మే గతిః || 15 ||

ధర్మార్థ కామ మోక్షాఖ్య పురుషార్థ ప్రదాయినే |
నారాయణ నమస్తేఽస్తు పునస్తేఽస్తు నమో నమః || 16 ||

– ప్రార్థనా –
నారాయణ త్వమేవాసి దహరాఖ్యే హృది స్థితః |
ప్రేరితా ప్రేర్యమాణానాం త్వయా ప్రేరితమానసః || 17 ||

త్వదాజ్ఞాం శిరసా కృత్వా భజామి జనపావనం | [ధృత్వా]
నానోపాసనమార్గాణాం భవకృద్భావబోధకః || 18 ||

భావార్థకృద్భవాతీతో భవ సౌఖ్యప్రదో మమ |
త్వన్మాయామోహితం విశ్వం త్వయైవ పరికల్పితం || 19 ||

త్వదధిష్ఠానమాత్రేణ సా వై సర్వార్థకారిణీ |
త్వమేవ తాం పురస్కృత్య మమ కామాన్ సమర్థయ || 20 ||

న మే త్వదన్యస్త్రాతాస్తి త్వదన్యన్న హి దైవతం |
త్వదన్యం న హి జానామి పాలకం పుణ్యవర్ధనం || 21 ||

యావత్సాంసారికో భావో మనఃస్థో భావనాత్మకః |
తావత్సిద్ధిర్భవేత్ సాధ్యా సర్వథా సర్వదా విభో || 22 ||

పాపినామహమేకాగ్రో దయాళూనాం త్వమగ్రణీః |
దయనీయో మదన్యోఽస్తి తవ కోఽత్ర జగత్త్రయే || 23 ||

త్వయాహం నైవ సృష్టశ్చేన్న స్యాత్తవ దయాళుతా |
ఆమయో వా న సృష్టశ్చేదౌషధస్య వృథోదయః || 24 ||

పాపసంఘపరిశ్రాంతః పాపాత్మా పాపరూపధృక్ |
త్వదన్యః కోఽత్ర పాపేభ్యస్త్రాతాస్తి జగతీతలే || 25 ||

త్వమేవ మాతా చ పితా త్వమేవ
త్వమేవ బంధుశ్చ సఖా త్వమేవ |
త్వమేవ సేవ్యశ్చ గురుస్త్వమేవ
త్వమేవ సర్వం మమ దేవదేవ || 26 ||

– ఫలశ్రుతిః –
ప్రార్థనా దశకం చైవ మూలాష్టకమతః పరం |
యః పఠేచ్ఛృణుయాన్నిత్యం తస్య లక్ష్మీః స్థిరా భవేత్ || 27 ||

నారాయణస్య హృదయం సర్వాభీష్టఫలప్రదం |
లక్ష్మీహృదయకం స్తోత్రం యది చేత్తద్వినాకృతం || 28 ||

తత్సర్వం నిష్ఫలం ప్రోక్తం లక్ష్మీః క్రుధ్యతి సర్వదా |
ఏతత్ సంకలితం స్తోత్రం సర్వకామఫలప్రదం || 29 ||

జపేత్ సంకలితం కృత్వా సర్వాభీష్టమవాప్నుయాత్ |
నారాయణస్య హృదయమాదౌ జప్త్వా తతః పరం || 30 ||

లక్ష్మీహృదయకం స్తోత్రం జపేన్నారాయణం పునః |
పునర్నారాయణం జప్త్వా పునర్లక్ష్మీనుతిం జపేత్ || 31 ||

తద్వద్ధోమాదికం కుర్యాదేతత్ సంకలితం శుభం |
ఏవం మధ్యే ద్వివారేణ జపేత్ సంకలితం తు తత్ || 32 ||

లక్ష్మీహృదయకే స్తోత్రే సర్వమన్యత్ ప్రకాశితం |
సర్వాన్ కామానవాప్నోతి ఆధివ్యాధిభయం హరేత్ || 33 ||

గోప్యమేతత్ సదా కుర్యాన్న సర్వత్ర ప్రకాశయేత్ |
ఇతి గుహ్యతమం శాస్త్రం ప్రాప్తం బ్రహ్మాదిభిః పురా || 34 ||

లక్ష్మీహృదయప్రోక్తేన విధినా సాధయేత్ సుధీః |
తస్మాత్ సర్వప్రయత్నేన సాధయేత్ గోపయేత్ సుధీః || 35 ||

యత్రైతత్ పుస్తకం తిష్ఠేల్లక్ష్మీనారాయణాత్మకం |
భూతపైశాచవేతాళ భయం నైవ తు సర్వదా || 36 ||

భృగువారే తథా రాత్రౌ పూజయేత్ పుస్తకద్వయం |
సర్వథా సర్వదా స్తుత్యం గోపయేత్ సాధయేత్ సుధీః |
గోపనాత్ సాధనాల్లోకే ధన్యో భవతి తత్త్వతః || 37 ||

ఇత్యథర్వరహస్యే ఉత్తరభాగే శ్రీ నారాయణ హృదయం ||