శ్రీ ఆర్తత్రాణపరాయణ నారాయణ స్తోత్రం

శ్రీ ఆర్తత్రాణపరాయణ నారాయణ స్తోత్రం

ప్రహ్లాద ప్రభురస్తి చేత్తవ హరిః సర్వత్ర మే దర్శయ
స్తంభే చైనమితి బ్రువంతమసురం తత్రావిరాసీద్ధరిః |
వక్షస్తస్య విదారయన్నిజనఖైర్వాత్సల్యమావేదయ-
-న్నార్తత్రాణపరాయణః స భగవాన్ నారాయణో మే గతిః || 1 ||

శ్రీరామాత్ర విభీషణోఽయమధునా త్వార్తో భయాదాగతః
సుగ్రీవానయ పాలయేఽహమధునా పౌలస్త్యమేవాగతం |
ఏవం యోఽభయమస్య సర్వవిదితం లంకాధిపత్యం దదా-
-వార్తత్రాణపరాయణః స భగవాన్ నారాయణో మే గతిః || 2 ||

నక్రగ్రస్తపదం సముద్యతకరం బ్రహ్మేశ దేవేశ మాం
పాహీతి ప్రచురార్తరావకరిణం దేవేశ శక్తీశ చ |
మా శోచేతి రరక్ష నక్రవదనాంచక్రశ్రియా తత్క్షణా-
-దార్తత్రాణపరాయణః స భగవాన్ నారాయణో మే గతిః || 3 ||

హా కృష్ణాచ్యుత హా కృపాజలనిధే హా పాండవానాం గతే
క్వాసి క్వాసి సుయోధనాదవగతాం హా రక్ష మాం ద్రౌపదీం |
ఇత్యుక్తోఽక్షయవస్త్రరక్షితతనుం యోరక్షదాపద్గణా-
-దార్తత్రాణపరాయణః స భగవాన్ నారాయణో మే గతిః || 4 ||

యత్పాదాబ్జనఖోదకం త్రిజగతాం పాపౌఘవిధ్వసనం
యన్నామామృతపూరణం చ పిబతాం సంతాపసంహారకం |
పాషాణశ్చ యదంఘ్రితో నిజవధూరూపం మునేరాప్తవా-
-నార్తత్రాణపరాయణః స భగవాన్ నారాయణో మే గతిః || 5 ||

యన్నామశ్రుతిమాత్రతోఽపరిమితం సంసారవారాన్నిధిం
త్యక్త్వా గచ్ఛతి దుర్జనోఽపి పరమం విష్ణోః పదం శాశ్వతం |
తన్నైవాద్భుతకారణం త్రిజగతాం నాథస్య దాసోఽస్మ్యహ-
-మార్తత్రాణపరాయణః స భగవాన్ నారాయణో మే గతిః || 6 ||

పిత్రా భ్రాతరముత్తమాంకగమితం భక్తోత్తమం యో ధ్రువం
దృష్ట్వా తత్సమమారురుక్షుముదితం మాత్రావమానం గతం |
యోఽదాత్ తం శరణాగతం తు తపసా హేమాద్రిసింహాసనం
హ్యార్తత్రాణపరాయణః స భగవాన్ నారాయణో మే గతిః || 7 ||

నాథేతి శ్రుతయో న తత్త్వమతయో ఘోషస్థితా గోపికా
జారిణ్యః కులజాతిధర్మవిముఖా అధ్యాత్మభావం యయుః |
భక్తిర్యస్య దదాతి ముక్తిమతులాం జారస్య యః సద్గతి-
-ర్హ్యార్తత్రాణపరాయణః స భగవాన్ నారాయణో మే గతిః || 8 ||

క్షుత్తృష్ణార్తసహస్రశిష్యసహితం దుర్వాససం క్షోభితం
ద్రౌపద్యా భయభక్తియుక్తమనసా శాకం స్వహస్తార్పితం |
భుక్త్వా తర్పయదాత్మవృత్తిమఖిలామావేదయన్ యః పుమా-
-నార్తత్రాణపరాయణః స భగవాన్ నారాయణో మే గతిః || 9 ||

యేనారాక్షి రఘూత్తమేన జలధేస్తీరే దశాస్యానుజ-
-స్త్వాయాతం శరణం రఘూత్తమ విభో రక్షాతురం మామితి |
పౌలస్త్యేన నిరాకృతోఽథ సదసి భ్రాత్రా చ లంకాపురే
హ్యార్తత్రాణపరాయణః స భగవాన్ నారాయణో మే గతిః || 10 ||

యేనావాహి మహాహవే వసుమతీ సంవర్తకాలే మహా-
-లీలాక్రోడవపుర్ధరేణ హరిణా నారాయణేన స్వయం |
యః పాపిద్రుమసంప్రవర్తమచిరాద్ధత్త్వా చ యోఽగాత్ ప్రియా-
-మార్తత్రాణపరాయణః స భగవాన్ నారాయణో మే గతిః || 11 ||

యోద్ధాసౌ భువనత్రయే మధుపతిర్భర్తా నరాణాం బలే
రాధాయా అకరోద్రతే రతిమనఃపూర్తిం సురేంద్రానుజః |
యో వా రక్షతి దీనపాండుతనయాన్నాథేతి భీతిం గతా-
-నార్తత్రాణపరాయణః స భగవాన్ నారాయణో మే గతిః || 12 ||

యః సాందీపినిదేశతశ్చ తనయం లోకాంతరాత్ సన్నతం
చానీయ ప్రతిపాద్య పుత్రమరణాదుజ్జృంభమాణార్తయే |
సంతోషం జనయన్నమేయమహిమా పుత్రార్థసంపాదనా-
-దార్తత్రాణపరాయణః స భగవాన్ నారాయణో మే గతిః || 13 ||

యన్నామస్మరణాదఘౌఘసహితో విప్రః పురాఽజామిలః
ప్రాణాన్ముక్తిమశేషితామను చ యః పాపౌఘతాపార్తియుక్ |
సద్యో భాగవతోత్తమాత్మని మతిం ప్రాపాంబరీషాభిధ-
-శ్చార్తత్రాణపరాయణః స భగవాన్ నారాయణో మే గతిః || 14 ||

యోరక్షద్వసనాదినిత్యరహితం విప్రం కుచైలాభిధం
దీనాదీనచకోరపాలనపరః శ్రీశంఖచక్రోజ్జ్వలః |
తజ్జీర్ణాంబరముష్టిపాత్రపృథుకానాదాయ భుక్త్వా క్షణా-
-దార్తత్రాణపరాయణః స భగవాన్ నారాయణో మే గతిః || 15 ||

యత్కల్యాణగుణాభిరామమమలం మంత్రాణి సంశిక్షతే
యత్సంశేతిపతిప్రతిష్ఠితమిదం విశ్వం వదత్యాగమః |
యో యోగీంద్రమనఃసరోరుహతమఃప్రధ్వంసవిద్భానుమా-
-నార్తత్రాణపరాయణః స భగవాన్ నారాయణో మే గతిః || 16 ||

కాళిందీహృదయాభిరామపులినే పుణ్యే జగన్మంగళే
చంద్రాంభోజవటే పుటే పరిసరే ధాత్రా సమారాధితే |
శ్రీరంగే భుజగేంద్రభోగశయనే శేతే సదా యః పుమా-
-నార్తత్రాణపరాయణః స భగవాన్ నారాయణో మే గతిః || 17 ||

వాత్సల్యాదభయప్రదానసమయాదార్తార్తినిర్వాపణా-
-దౌదార్యాదఘశోషణాదగణితశ్రేయః పదప్రాపణాత్ |
సేవ్యఃశ్రీపతిరేవ సర్వజగతామేతే హి తత్సాక్షిణః
ప్రహ్లాదశ్చ విభీషణశ్చ కరిరాట్ పాంచాల్యహల్యాధ్రువః || 18 ||

ఇతి శ్రీమచ్ఛంకరాచార్య విరచితం శ్రీ ఆర్తత్రాణపరాయణ నారాయణ స్తోత్రం ||